دراسة و ممارسة الطالب المبتعث للغة الإنجليزية

السلام عليكم و رحمة الله ،،، عيدكم مبارك

مع الموافقة على تمديد البعثات الخارجية لخمس سنوات أخرى ، نريد أن نتشارك في رؤيتنا حول دراستنا و ممارستنا للغة الإنجليزية في الخارج كطلبة مبتعثين حتى يكون الموضوع مرجع مهم لمن خلفنا من الطلاب و الطالبات.

الموضوع سيكون متشّعب جدًا لو أصبح بلا نقاط معينة يقوم عليها موضوعنا المتواضع هذا ، و لكن بين يديكم نقاط معيّنة أتمنى من الجميع مشاركتي الرأي حولها. نسولف بالعامي اسهل لنا و للمستمعين أقصد القارئين الكرام .


1- أحتاج لمعهد تجاري أم معهد جامعة ؟

سؤال في التسعينات الصراحة ، لأن الطالب المبتعث ما يدري هل هو يحتاج المعاهد التجارية اللي تعلمك ( اللغة الإنجليزية لكل يوم ) أو معاهد اللغة الإنجليزية في الجامعات و اللي تؤهلك لتصبح طالب جامعي قادر على القراءة و الإستماع و الكتابة في الجامعة ؟؟؟

في رأيي الشخصي أن الطالب اللي خلفيته في الإنجليزي صفر يحتاج إلى تأسيس نفسه في معهد تجاري لبضعة أشهر حتى ينطلق لسانه و يتمكن من التخاطب و الإستماع و لو بشكل بسيط ، ثم ينتقل لمعهد جامعي يقوم بفرك الطالب و عجنه و خبزه حتى يتمرجل قصدي يكون قابل للتواصل مع البيئة الجامعية بكل سلاسة و انسيابية .. احسني اوصف سيارة (1) أما الطالب اللي يملك أساسيات الإنجليزي و قادر على التواصل مع الاجانب بشكل عادي أو قريب من الصعوبة فهذا أحسن له يتلحلح و يشوف له معهد جامعة ؛ ما يؤيد كلامي في هالشئ هو أن بعض معاهد الجامعات لا توفر كورسات لتأسيس الإنجليزي لمن لا يملك أساسيتها لكن معاهد التجارية تدرسك من الصفر لين تطلع اطلق من مذيعي القناة الثانية لكن لا تضمن المعاهد التجارية لتكون مؤهل لدخول الجامعة < عنده انهم اطلق ناس يتكلمون انقليزي



2- سمعنا أن الإختلاط مع العرب يؤثر تأثير سلبي في تعلم اللغة ؟؟

و الله الكلام صح و مو صح في نفس الوقت !!

يكون صح لما تطق حنك معهم في الفصل و خلال الدوام الدراسي باللغة العربية ، و لما تسدح امها جلسة معهم كل يوم لين تالي الليل . لكن يكون الكلام غلط لما تتحاشى التكلم معهم بغير الإنجليزي خلال الدوام و لما ما تجلس مع ربعك العرب إلا فترات قصيرة مقارنة بجلستك مع الأجانب ،،،

يبقى ان البعد عن العرب ما يكون طول فترة البعثة !!! ترى العرب ما فيهم جرب عشان تبعد عنهم حتى و ان قال المثل ( العرب جرب ) و تذكر ان ما ينفعك بعد الله في وقت الأزمات إلا العرب و خصوصًا الخليجيين و السعوديين

3- أنا طالب في المستوى الثالث ، قل ماشاء الله و ابشرك اني امارس الانقليزي مع طالب في المستوى الأول .. وش رأيك مانيب احسن واحد في العالم ؟

لا و الله إلا انك خايب يالخايب ،، دائمًا مارس اللغة مع اللي احسن منك فيها ... إلا في حالة انك تبي تختبر نفسك في الانقليزي و بتصحح أخطاء اللي أقل منك ، لكن لا يكون هذا وضعك دائمًا !!! أحتك مع اللي احسن منك

4- أنا مبتعث و بأرجع للديرة ، عشان كذا ما يحتاج اتواصل معه باللغة العامية ! و أتعب نفسي بتعلم كلماتهم !!!

في نظري المتواضع ان هالكلام خطأ كبيييييير ، لأنه و ببساطة أقرب الطرق إلى قلوب الناس عامة هو التكلم بنفس ما يتكلمون ؛ أنا أشبّه اللي يتكلم مع الأجانب باللغة الاكاديمية مثل أبو الطيب المتنبي اذا تكلم مع سعوديين بلهجته الفصحى .. تحسونها غثاثة و ثقالة دم صح ؟؟ انا لو كاتب هالموضوع بلغة فصحى أفلق نفسي ببلكة ان كملتوا نص الموضوع لكن اللهجة العامية او الدارجة هي اللي يحبها الشعب غالبًا .

أنا كـ مواطن سعودي من أرض العروبة أفرح إذا لقيت لي شخص مقيم يتكلم بنفس لهجة السعوديين ،، و الله احسها اقرب لقلبي من واحد نص كلامه ايسسسس فيه ؟ و من تجربة شخصية ، لقيت التواصل شبه صعب مع الكنديين لما كان كلامي كله أكاديميك و كلمات يحك الكندي مخه لين يعرف معناها ، لكن و بفضل الله ثم بفضل بعض المواقع لقيت ان التواصل معهم و بلهجتهم و بطريقتهم الخاصة أسهل بكثيييييير من لهجة شوفة النفس .. قصدي اللغة الأكاديمية

طبعًا هذا ما يلغي أهمية اللغة الأكاديمة ، لكن اللغة الأكاديمة محصورة بين جدران الجامعة و خلال 6 ساعات كحد أقصى و باقي الوقت تبي تحتك مع الشعب أو مع السعوديين في العزب.


5- طيب سلّمنا أمرنا لله ثم لكلامك ، متى تبينا نتعلم لهجتهم لا بارك الله فيهم و لا فيك ؟؟

أول شئ لا تسب لهجتهم أفضل تعلمها خلال المراحل الاخيرة من دراسة اللغة الإنجليزية ، وقتها بيكون عندك محصول لا بأس به من الإنجليزي و في إستطاعتك تعلم أكثر كلمات من قبل .

6- نسيييييت يا ولد اهم سؤال ... كيف اتعلم اللغة ؟؟

كيف تتعلم اللغة ؟ اقرأ و استمع و تكلم .. الكلام في هالشئ يتشعب كثير لكن أنصحك و بقوة بمشاهدة هالمحاضرة اضغط هنا

(1) ... بعض المعاهد الجامعية تكون ادرى و اخس من بعض المعاهد الخاصة ، لذلك لا تعتمد على كون المعهد تابع للجامعة حتى تقول انك في معهد جامعي ،، بل أسأل من درس فيها حتى تتكون نظرة عندك حول هالمعهد و هل يكون يصلح لك أو لا ؟؟